İndoneziyada 7,7 bal gücündə dəhşətli zəlzələdən – FOTOLAR

İndoneziyanın Flores adası yaxınlığında 7,7 bal gücündə dəhşətli zəlzələ baş verib. İlkin məlumatlara görə, təbii fəlakət nəticəsində azı 38 nəfər həyatını itirib, çoxlu sayıda insan yaralanıb.

hadiseler.info xəbər verir ki, ABŞ Geoloji Xidmətinin məlumatına görə, zəlzələ yerli vaxtla səhər saat 05:58-də, təxminən 10 kilometr dərinlikdə qeydə alınıb. Təkanların episentri Şərqi Nusa Tenqqara əyalətindəki Ende şəhərindən 68 kilometr şimal-şimal-qərbdə yerləşib. Baş verən güclü yeraltı təkanlardan sonra ərazidə bir neçə güclü afterşok qeydə alınıb.

Sürüşmə kəndi uddu, 2 min insan evsiz qaldı

İndoneziyanın Milli Fəlakətlərin İdarə Edilməsi Agentliyinin rəhbəri Suharyanto bildirib ki, xilasedicilər Sikka, Manqqarai və Şərqi Manqqarai bölgələrində 38 nəfərin cəsədini aşkarlayıblar. Həyatını itirənlərdən 16-sı Reok kəndində baş verən torpaq sürüşməsi zamanı torpaq qatı altında qalıb.

Zəlzələ nəticəsində Nagekeo bölgəsində təxminən 2 min sakin evlərini tərk edərək müvəqqəti sığınacaqlara yerləşib. Bölgədə elektrik və rabitə xətlərinin sıradan çıxması xilasetmə əməliyyatlarını və məlumatların toplanmasını çətinləşdirir.

Sunami həyəcanı və zədələnən infrastrukturlar

Zəlzələdən dərhal sonra hakimiyyət orqanları 4 əyalətdə sunami xəbərdarlığı elan edərək əhalini yüksək ərazilərə təxliyə olmağa çağırıb. Lakin dəniz səviyyəsində təhlükəli dəyişiklik qeydə alınmadığı üçün xəbərdarlıq sonradan ləğv olunub.

Sürüşmələr nəticəsində Flores adasının əsas nəqliyyat damarı olan 700 kilometrlik Trans-Flores magistral yolu bağlanıb. Fövqəladə vəziyyətə müdaxilə etmək üçün əraziyə 3 helikopter və xilasetmə gəmisi cəlb edilib.