Leyla Əliyeva Səmərqənddə uşaqların rifahına dair Ümumdünya Sammitində iştirak edib – FOTO

Heydər Əliyev Fondunun vitse-prezidenti Leyla Əliyeva oktyabrın 21-də Özbəkistanın Səmərqənd şəhərində keçirilən “Uşaqların rifahına investisiya: gələcək nəsillərin dayanıqlı və ədalətli inkişafına doğru” mövzusundakı Ümumdünya Sammitinin və Uşaq Onkologiyası üzrə İkinci Beynəlxalq Konqresin rəsmi açılış mərasimində iştirak edib.

hadiseler.info AZƏRTAC-a istinadən xəbər verir ki, tədbirin açılış mərasimindən əvvəl Özbəkistan Respublikasının birinci xanımı Ziroat Mirziyoyeva Heydər Əliyev Fondunun vitse-prezidenti Leyla Əliyevanı və digər yüksəksəviyyəli qonaqları səmimiyyətlə qarşılayıb. Mərasim çərçivəsində birgə xatirə fotosu çəkdirilib.

Oktyabrın 21-dən 22-dək davam edəcək bu mötəbər beynəlxalq tədbirlərə 100-dən çox ölkənin nümayəndələri qatılıb.

Ümumdünya Sammiti Özbəkistan tərəfinin təşəbbüsü, BMT Baş katibinin uşaqlara qarşı zorakılıq məsələləri üzrə xüsusi nümayəndəliyi, BMT-nin Uşaq Fondu (UNICEF), Ümumdünya Səhiyyə Təşkilatı (ÜST) və Dünya Bankının birgə təşkilatçılığı ilə keçirilir.

Sammitin yekununda uşaqların hüquqlarının və sağlığının qorunmasını əhatə edən mühüm Səmərqənd Bəyannaməsinin qəbul olunması gözlənilir.