Milli Musiqi Günündə dahi bəstəkar Üzeyir Hacıbəylinin məzarı ziyarət olunub

Sentyabrın 18-də dahi bəstəkar, musiqişünas, pedaqoq, publisist və ictimai xadim Üzeyir Hacıbəylinin anadan olmasının 141-ci ildönümü tamam olur. Bu gün həm də ölkəmizdə Milli Musiqi Günü kimi qeyd edilir.  

hadiseler.info xəbər verir ki, əlamətdar gün münasibətilə I Fəxri xiyabanda Üzeyir Hacıbəylinin məzarı ziyarət olunub. Tədbirdə mədəniyyət naziri Adil Kərimli, Bəstəkarlar İttifaqının sədri Firəngiz Əlizadə və tanınmış mədəniyyət xadimləri iştirak ediblər. Nazir Adil Kərimli Milli Musiqi Gününün ümummilli lider Heydər Əliyevin 1995-ci ildə imzaladığı sərəncama əsasən qeyd olunduğunu xatırladıb və eyni zamanda Heydər Əliyev Fondu ilə Mədəniyyət Nazirliyinin təşkilatçılığı ilə 18–30 sentyabr tarixlərində XVIII Beynəlxalq Musiqi Festivalının başladığını diqqətə çatdırıb.  

Mərasim çərçivəsində:

 Üzeyir Hacıbəylinin məzarı üstünə əklil qoyulub və çiçəklər düzülüb.

 Musiqi korifeylərindən Qara Qarayev, Fikrət Əmirov, Bülbül, Rəşid Behbudov, Niyazi və Müslüm Maqomayevin məzarları ziyarət edilib.  

 Ümummilli lider Heydər Əliyev və akademik Zərifə xanım Əliyevanın xatirəsi ehtiramla yad olunaraq məzarları üzərinə tər çiçəklər qoyulub.