Odessa yaxınlığında azərbaycanlılar olan gəmiyə dron hücumu: 2 ölü- VİDEO

Qara dənizdə heyətində Azərbaycan vətəndaşlarının da olduğu “TEDY” adlı xarici yük gəmisi sentyabrın 9-da dron hücumuna məruz qalıb.

hadiseler.info xəbər verir ki, bu barədə Azərbaycan Xarici İşlər Nazirliyi məlumat yayıb.

Hücum nəticəsində Azərbaycan vətəndaşları Aslan Əliyev və Asim Qasımovun həlak olduğu, İmran Novruzov və Rauf Əliyevin isə xəsarət aldığı bildirilib. Yaralılar Ukraynanın Çernomorsk şəhər xəstəxanasına yerləşdiriliblər.

Hazırda Xarici İşlər Nazirliyi tərəfindən ölkəmizin diplomatik nümayəndəlikləri və müvafiq ölkələrin səlahiyyətli qurumları ilə koordinasiya işləri aparılır. Yaralı vətəndaşların tibbi müayinəsi, müalicəsi, ölkəyə qaytarılması və cənazələrin təhvil verilməsi istiqamətində zəruri konsulluq dəstəyi göstərilir.

XİN Azərbaycan vətəndaşlarını hərbi əməliyyatların davam etdiyi və ya təhlükəsizlik vəziyyətinin qeyri-sabit olduğu bölgələrə səfər etməkdən, həmin ərazilərdə əmək fəaliyyəti ilə məşğul olmaqdan və bu marşrutlar üzrə fəaliyyət göstərən nəqliyyat vasitələrində, o cümlədən gəmilərdə işləməkdən çəkinməyə bir daha çağırıb.