Prezident İlham Əliyev: “Son beş ildə Özbəkistana 7 dəfə səfər etmişəm”

hadiseler.info Azərbaycan Respublikasının Prezidenti İlham Əliyevin Özbəkistanın Milli İnformasiya Agentliyinə (UzA) verdiyi müsahibəyə istinadən xəbər verir ki, Azərbaycan və Özbəkistan arasında münasibətlər ortaq tarixə, mədəniyyətə və mənəvi dəyərlərə əsaslanır. Dövlətlərarası əlaqələrin son illər misli görünməmiş inkişaf mərhələsinə qədəm qoyaraq müttəfiqlik səviyyəsinə yüksəldiyi vurğulanıb.

Dövlət başçısı Özbəkistan Prezidenti Şavkat Mirziyoyev ilə aralarındakı səmimi dostluq və qarşılıqlı etimadın əlaqələrin inkişafında xüsusi rol oynadığını bildirib:

“Son beş ildə ən yüksək səviyyədə müntəzəm 15 qarşılıqlı səfər və sıx təmaslarımız bu əlaqələrin dinamik inkişafı üçün əlverişli şərait yaradır. Bu, son beş ildə mənim üçüncü dövlət və ümumilikdə qardaş ölkəyə yeddinci səfərimdir. Gözəl və bənzərsiz Özbəkistana səfər etməkdən daim böyük məmnunluq duyuram”.

Prezident həmçinin qarşılıqlı dövlət səfərləri zamanı imzalanan Strateji tərəfdaşlığın dərinləşdirilməsi haqqında Bəyannamə və Müttəfiqlik münasibətləri haqqında Müqavilənin iki ölkə arasındakı müttəfiqliyi rəsmən möhkəmləndirdiyini diqqətə çatdırıb. Ayrıca, 2023-cü ildə təsis edilmiş Ali Dövlətlərarası Şuranın strateji tərəfdaşlıq üçün mühüm mexanizmə çevrildiyi qeyd olunub.