Qanunsuz narkotiklərlə bağlı mühüm statistika: 187 milyon manatlıq maddə dövriyyədən çıxarıldı

Azərbaycanda cari ilin yanvar-iyul ayları ərzində qanunsuz dövriyyədən çıxarılmış 6 ton 223 kiloqramdan çox narkotik vasitə və psixotrop maddənin ümumi dəyəri 187 milyon 200 min AZN qiymətləndirilir.

hadiseler.info Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupuna istinadən bildirir ki, hesabat dövründə kompleks əməliyyat-axtarış tədbirləri nəticəsində ümumilikdə 4 963 cinayət faktı aşkarlanıb.

Aşkarlanan faktlardan 1 250-si narkotiklərin qanunsuz satışı, 3 613-ü qanunsuz əldə edilib saxlanılması, 97-si tərkibində narkotik olan bitkilərin əkilib becərilməsi, 3-ü isə digər cinayətlərlə bağlı olub.

Qanunsuz dövriyyədən götürülənlərin 5 ton 307 kq-dan çoxunu marixuana, 257 kq-nı heroin, 247 kq-dan çoxunu həşiş, 124 kq-nı tiryək, 161 kq-nı psixotrop maddələr və 125 kq-nı digər vasitələr təşkil edib. Həmçinin minlərlə metadon həbi və çətənə bitkisi aşkar edilərək götürülüb.

Bununla yanaşı, Daxili İşlər Nazirliyinin təşkilatçılığı ilə 1167,2 hektar sahədən yabanı halda bitmiş 327 tondan çox narkotik tərkibli bitki müəyyən olunaraq məhv edilib.