Rasim Həsənovun azadlığa buraxılması qərarından protest verilib

Müdafiə Nazirliyinin Mərkəzi Hərbi Həkim Komissiyasının sabiq rəisi Rasim Həsənov barəsində çıxarılmış məhkəmə hökmündən apellyasiya protesti verilib.

hadiseler.info xəbər verir ki, işə Bakı Apellyasiya Məhkəməsində baxılacaq. İlk baxış iclasının keçiriləcəyi tarix hələlik bəlli deyil.

Qeyd edək ki, Korrupsiyaya qarşı Mübarizə Baş İdarəsində aparılan ibtidai istintaq nəticəsində R.Həsənov rüşvətalma və vəzifə səlahiyyətlərini aşma kimi ağır maddələrlə təqsirləndirilərək cinayət işi Bakı Hərbi Məhkəməsinə göndərilmişdi. Məhkəmədə dövlət ittihamçısı onun 10 il müddətinə azadlıqdan məhrum edilməsini təklif etsə də, məhkəmə əməli dələduzluq maddələrinə tövsif edərək ona 7 000 manat cərimə cəzası kəsib, həbsdə qaldığı müddət nəzərə alınaraq məbləğ 5 000 manata endirilib və o, məhkəmə zalından azadlığa buraxılıb. Prokurorluq həmin hökmdən apellyasiya protesti verib.