Rusiya ordusu Odessada 21 mərtəbəli binanı vurub

Rusiya qoşunlarının Ukraynanın Odessa şəhərində yerləşən 21 mərtəbəli yaşayış binasına gecə hücumu nəticəsində üçü uşaq olmaqla 17 nəfər xəsarət alıb.

hadiseler.info xəbər verir ki, bu barədə Odessa Şəhər Hərbi Administrasiyasının rəhbəri Sergey Lısak “Telegram” kanalında məlumat paylaşıb.

Bildirilib ki, zərbə nəticəsində binanın 10-cu mərtəbəsindən 17-ci mərtəbəsinədək olan mənzillərə, həmçinin həyətdə park edilmiş avtomobillərə ciddi ziyan dəyib.

Hazırda hadisə yerində kommunal və fövqəladə xidmətlərin əməkdaşları zərəri qeydə alır və hücumun nəticələrini aradan qaldırırlar. Sakinlərə zəruri yardım və məsləhət göstərilməsi üçün ərazidə operativ qərargahlar təşkil olunub.