“Sabah” bu gün Çempionlar Liqasında TNS ilə cavab oyununa çıxacaq

Azərbaycan təmsilçisi “Sabah” bu gün UEFA Çempionlar Liqasının I təsnifat mərhələsində cavab görüşünə çıxacaq.

“Report”un məlumatına görə, Valdas Dambrauskasın rəhbərlik etdiyi komanda səfərdə Uels çempionu TNS ilə qarşılaşacaq. Oyun “Park Holl” stadionunda keçiriləcək və Bakı vaxtı ilə saat 21:30-da başlayacaq.

Qarşılaşmanı İspaniyadan olan baş hakim Mateo Buskets Ferrer idarə edəcək.

Bu cütün qalibi II təsnifat mərhələsində Şimali Makedoniyanın “Vardar” və Finlandiyanın KUPS komandaları arasında keçirilən qarşılaşmanın qalibi ilə üz-üzə gələcək.

Qeyd edək ki, Bakıda baş tutan ilk oyunda “Sabah” rəqibini 2:0 hesabı ilə məğlub edərək cavab görüşü öncəsi üstünlük əldə edib.