Şanlıurfada idman zalında bədbəxt hadisə baş verib, 8 yaşlı uşaq həlak olub- FOTOLAR

hadiseler.info xəbər verir ki, Türkiyənin Şanlıurfa şəhərində yerləşən Akabe TOKİ Anadolu Liseyinin idman zalında faciəvi bədbəxt hadisə yaşanıb.

Məktəbdə bədən tərbiyəsi müəllimi işləyən İbrahim Yavuz yay tətili səbəbindən 8 yaşlı oğlu Mert Ali Yavuzu özü ilə birlikdə idman zalına aparıb. Müəllim məşğələ keçdiyi zaman balaca Mert Ali zalda olan daşınan futbol qapısının toruna dırmaşmaq istəyib. Bu zaman ağır dəmirdən ibarət qapı dirəyi aşaraq uşağın üzərinə düşüb.

Zaldakıların köməyi ilə dirəyin altından çıxarılan və ağır xəsarətlərlə xəstəxanaya çatdırılan 8 yaşlı uşağın həyatını xilas etmək mümkün olmayıb. Həkimlərin bütün səylərinə baxmayaraq azyaşlı dünyasını dəyişib. Uşağın nəşi ailəsinə təhvil verilərək dəfn olunub.

Faktla bağlı hüquq-mühafizə organları tərəfindən genişmiqyaslı təhqiqat işləri aparılır.