Seneqal Prezidentinin Azərbaycana rəsmi səfəri gözlənilir

Bu ilin sonunadək Seneqalın Prezidenti Bassirou Diomaye Fayenin Azərbaycana rəsmi səfəri planlaşdırılır.

hadiseler.info xəbər verir ki, bu barədə Seneqalın Türkiyə, Azərbaycan, Türkmənistan və Gürcüstandakı fövqəladə və səlahiyyətli səfiri Mustafa Sohna Diop açıqlama verib.

Səfir bildirib ki, iki ölkə arasında yüksəksəviyyəli rəsmi təmaslar, o cümlədən nazirlər səviyyəsində səfərlər və dövlət başçısının gəlişi üzrə hazırlıq işləri aparılır. Görüşlərin ana xəttini iqtisadi-ticarət əlaqələri, xüsusilə neft-qaz sektoru təşkil edəcək. Seneqal tərəfi Azərbaycanın karbohidrogen ehtiyatlarının hasilatı, idarə olunması və emalı sahəsindəki zəngin təcrübəsini öyrənməkdə maraqlıdır.

Həmçinin qeyd olunub ki, ikitərəfli ticarət dövriyyəsini artırmaq üçün hər iki ölkənin özəl sektor nümayəndələri və iş adamları arasında sıx tərəfdaşlıq körpüsü qurulmalıdır.