Netanyahu seçkini uduzur: Ağ Ev müxalifətlə diplomatik körpülər salır

Birləşmiş Ştatlar rəhbərliyi İsrailin Baş naziri Benyamin Netanyahunun sürətlə düşən reytinqini nəzərə alaraq Yaxın Şərq strategiyasında gözlənilməz manevrlər etməyə başlayıb. Donald Tramp administrasiyası İsrail müxalifəti ilə ehtiyatlı və qeyri-rəsmi təmaslar qurur.

hadiseler.info xəbər verir ki, ABŞ-ın “Axios” portalının yaydığı məlumata görə, Ağ Ev bu addımı Yaxın Şərqdəki mühüm sülh və təhlükəsizlik təşəbbüslərini riskə atmamaq məqsədilə atır. İsrail müxalifətinin nümayəndələri ortaq tərəfdaşlar və sponsorlar vasitəsilə Vaşinqtona neytrallığı qorumaq mesajları ötürüblər.

Məlumata görə, Oval kabinetdə keçirilən son görüşlərin birində Tramp Netanyahudan seçkiqabağı reytinq göstəriciləri ilə maraqlanıb. İsrail Baş naziri cavab verməkdə tərəddüd etsə də, köməkçisi onun “qalib gəldiyini” iddia edib. Lakin reallıqda Netanyahu rəy sorğularında rəqiblərinə uduzur. Son sorğulara əsasən, Netanyahunun koalisiyası Knessetdə cəmi 49-53 mandat qazana bildiyi halda, keçmiş Baş Qərargah rəisi Qadi Ayzenkotun başçılıq etdiyi müxalifət bloku 67-70 mandata sahib ola bilər.

Ağ Ev oktyabrın 27-nə planlaşdırılan seçkilərin nəticəsindən asılı olmayaraq, Qəzza zolağındakı proseslərdən Səudiyyə Ərəbistanı ilə tarixi sövdələşməyə qədər olan planları irəlilətmək niyyətindədir. Mənbələr iddia edir ki, Trampın Netanyahuya münasibəti rəsmi bəyanatlardan daha soyuqdur.

ABŞ Prezidentinin şəxsi söhbətlərdə İsrail Baş nazirinin addımlarından məyusluğunu gizlətmədiyi və “Bibi” özünün ən böyük düşmənidir” dediyi vurğulanır. Mütəxəssislər Trampın ABŞ Konqresinə keçiriləcək seçkilər ərəfəsində Netanyahudan tamamilə uzaqlaşa biləcəyini ehtimal edirlər.