Trampın xüsusi nümayəndəsi Netanyahu ilə Qəzza planını müzakirə etdi

ABŞ Prezidenti Donald Trampın xüsusi nümayəndəsi Cared Kuşner İsrailin Baş naziri Benyamin Netanyahu ilə növbəti danışıqları keçirib.

hadiseler.info “The Times of Israel” mənbələrinə istinadən xəbər verir ki, Yərusəlim şəhərində təşkil edilən görüş Sülh Şurasının Qəzza zolağındakı münaqişənin nizamlanması üzrə hazırladığı planın bütün bəndləri daxilində irəliləyişə nail olmaq məqsədi daşıyır. Müzakirələrdə Sülh Şurasının ali nümayəndəsi Nikolay Mladenov və Böyük Britaniyanın keçmiş Baş naziri Toni Bleyer də yaxından iştirak ediblər.

Məlumat üçün bildirək ki, avqustun 16-da Cared Kuşner Misirdə HƏMAS rəhbərliyi ilə də bir araya gəlmişdi. Həmin görüşdə o, qruplaşma nümayəndələrini silahsızlaşdırma ilə bağlı üzərlərinə götürdükləri öhdəlikləri yerinə yetirməyə çağırmışdı. Bundan əvvəl isə İsrail tərəfi Sülh Şurasının irəli sürdüyü bu nizamlama planını qəbul etməkdən imtina etmişdi.