Türkiyədə dəhşətli anlar: Gəzinti gəmisi yandı, 115 sərnişin dənizə atıldı – VİDEO

Türkiyənin Muğla vilayətinin Fethiye rayonunda gəzinti gəmisində qəfil yangın baş verib.

hadiseler.info haberglobal-a istinadən xəbər verir ki, hadisə Katrancı körfəzində qeydə alınıb. “Toys Boat” adlı turizm gəmisinin mətbəx hissəsində müəyyən edilməyən səbəbdən alovlanma baş verib və qısa müddətdə bütün gəmini bürüyüb.

Gəmidə olan və aralarında uşaqların da olduğu 115 sərnişin xilas olmaq üçün xilasedici jiletləri geyinərək dənizə atılıblar. Hadisə yerinə dərhal Sahil Mühafizəsi, Dəniz Təhlükəsizliyi və tibb briqadaları cəlb olunub, ətrafdakı digər gəmilər də xilasetmə əməliyyatına dəstək veriblər.

Böyük ölçüdə yanaraq batmağa başlayan gəmidən sərnişinlərin təxliyəsi uğurla həyata keçirilib. İlkin məlumatlara görə, hadisə zamanı insan tələfatı qeydə alınmayıb. Yanğının başvermə səbəbləri araşdırılır.