Türkiyədə daha bir əməliyyat keçirildi – 1600-dən çox adam saxlanıldı

Türkiyədə mütəşəkkil cinayət dəstələrinə qarşı ölkə miqyasında “Küçələr Təhlükəsizlikdədir” (Sokaklar Güvende) adlı genişmiqyaslı xüsusi əməliyyat keçirilib.

hadiseler.info “TRT Haber”ə istinadən xəbər verir ki, bu barədə Türkiyənin ədliyyə naziri Akın Gürlek sosial şəbəkə hesabında məlumat verib.

Baş Prokurorluğun koordinasiyası ilə keçirilən 151 əməliyyata 11 mindən çox hüquq-mühafizə əməkdaşı cəlb olunub. Əməliyyat çərçivəsində 2594 şübhəli barəsində hüquqi tədbir görülüb, 1613 şəxs saxlanılıb, 618 nəfər haqqında isə həbs qətimkan tədbiri seçilib.

Axtarışlar zamanı 199 odlu silah, 2 əl qumbarası, 37 kiloqramdan çox narkotik maddə və 10 mindən artıq həb müsadirə olunub. Cinayətkar şəbəkələrin maliyyə resurslarına qarşı aparılan soruşdurma çərçivəsində 26,9 milyard lirəlik dövriyyə müəyyən edilib, 408 bank hesabına, 35 daşınmaz əmlaka, 31 avtomobilə və 10 şirkətə əl qoyulub.

Xatırladaq ki, bundan cəmi bir gün əvvəl Türkiyənin 15 vilayətində LGBT+ dərnəklərinə, aktivistlərə və gecə klublarına qarşı “Ailəm Təhlükəsizlikdədir” (Ailem Güvende) əməliyyatı keçirilmişdi.