Yük gəmisinə hücumda daha 3 azərbaycanlı yaralanıb – XİN

Qara dənizdə, Rumıniya sahilləri yaxınlığında “Royad Məmmədov” adlı xarici yük gəmisi dron hücumuna məruz qalıb.

hadiseler.info xəbər verir ki, bu barədə Azərbaycan Xarici İşlər Nazirliyi (XİN) məlumat yayıb.

Hücum nəticəsində gəminin kapitanı, Azərbaycan vətəndaşı, 1974-cü il təvəllüdlü Həsənov Rüstəm İsmayıl oğlu həlak olub. 2002-ci il təvəllüdlü digər vətəndaşımız Süleymanzadə Məhəmməd Həmzə oğlu isə itkin düşüb. Hazırda onun axtarışları davam etdirilir.

Gəmi heyətində olan digər Azərbaycan vətəndaşları xilas edilib, xəsarət alan 3 nəfər xəstəxanaya yerləşdirilib.

Azərbaycan XİN tərəfindən diplomatik nümayəndəliklər və aidiyyəti ölkələrin qurumları ilə koordinasiyalı şəkildə zəruri tibbi və konsulluq dəstəyi göstərilir, həlak olan vətəndaşımızın cənazəsinin ölkəyə gətirilməsi üçün müvafiq prosedurlar həyata keçirilir.

Nazirlik həlak olan dənizçinin ailəsinə başsağlığı verib, yaralananlara şəfa diləyib. Eyni zamanda, Azərbaycan vətəndaşlarına hərbi əməliyyatların getdiyi, təhlükəsizliyin qeyri-sabit olduğu bölgələrə səfər etməkdən və riskli marşrutlar üzrə fəaliyyət gösterən gəmilərdə çalışmaqdan çəkinməyi bir daha tövsiyə edib.