Yük maşını ilə toqquşan avtomobil qəlpələrə ayrıldı — Eyni ailədən 3 ölü, 1 yaralı

Türkiyənin Uşaq vilayətində ölümə və xəsarətə səbəb olan ağır yol-nəqliyyat hadisəsi baş verib.

hadiseler.info İHA-ya istinadən xəbər verir ki, hadisə Eşmə-Uşaq avtomobil yolunun Ulubəy rayonu yaxınlığında qeydə alınıb. C.A. (49) idarə etdiyi 35 BLZ 348 dövlət nömrə nişanlı yük avtomobili qarşı tərəfdən gələn Ruhi Akyılın (71) idarə etdiyi 64 DY 664 plakalı minik avtomobili ilə toqquşub. Zərbənin gücündən minik maşını yararsız hala düşüb, yük avtomobili isə yoldan çıxaraq tarlaya girib.

Hadisə yerinə dərhal xilasedicilər, polis, jandarma və təcili tibbi yardım briqadaları cəlb olunub. Həkimlərin yoxlaması zamanı minik avtomobilinin sürücüsü Ruhi Akyıl, onun həyat yoldaşı Döndü Akyıl (72) və qızı Nəvcan Sakaryalının (44) hadisə yerində həyatını itirdiyi müəyyən edilib.

Qəzada yaralanan yük maşınının sürücüsü Uşaq Təhsil və Araşdırma Xəstəxanasına çatdırılıb. O, müalicəsi başa çatdıqdan sonra hüquq-mühafizə orqanları tərəfindən saxlanılıb. Faktla bağlı araşdırma aparılır.