18 yaşlı peşəkar qolfçu qəfil həyatını itirdi

Dünya idman ictimaiyyəti gənc idmançının qəfil ölümü ilə sarsılıb.

hadiseler.info xəbər verir ki, Avstraliyanın gənc və ümidverici qolfçusu Cessika Benq 18 yaşında beyinə qansızma nəticəsində dünyasını dəyişib.

BBC-nin Avstraliyanın peşəkar qadın qolf turunun (WPGA Tour of Australasia) rəsmi bəyanatına istinadən yaydığı məlumata görə, avqustun 1-də Tailandda keçiriləcək turnirə məşq prosesi zamanı gənc idmançının səhhəti qəfildən pisləşib. O, təcili olaraq Banqkokdakı xəstəxanalardan birinə çatdırılaraq əməliyyat olunub.

Təxminən iki həftə reanimasiya şöbəsində həyat mübarizəsi aparan Cessika Benq avqustun 14-də vəfat edib.

Qeyd edək ki, 2025-ci ilin sonlarında peşəkar idmana qədəm qoyan Benq, 2026-cı ilin əvvəlində karyerasının cəmi beşinci turniri olan “Ford Women’s NSW Open 2026” regional seçmə yarışında ilk böyük qələbəsini qazanmışdı.