Firdovsi Umudov Avropa birinciliyinə yollanacaq idmançılarla görüşdü—FOTOLAR

Kosovo Respublikasının Priştina şəhərində keçiriləcək ağırlıqqaldırma üzrə U-15 və yeniyetmələr arasında Avropa birinciliyi öncəsi milli heyətlə rəsmi görüş keçirilib.

hadiseler.info xəbər verir ki, avqustun 20-dən 27-dək təşkil olunacaq möhtəşəm yarışda Azərbaycanı 11 perspektivli atlet təmsil edəcək.

Azərbaycan Ağırlıqqaldırma Federasiyasının (AAF) vitse-prezidenti Firdovsi Umudov qitə birinciliyinə yollanacaq heyət üzvləri ilə bir araya gələrək onlara məsul yarışda uğurlar arzulayıb. F.Umudov bildirib ki, ölkə rəhbərliyi tərəfindən idmanın inkişafına və gənc idmançılara xüsusi diqqət yetirilir. O, yüksək nəticələr qazanmaq üçün komandadaxili intizamın vacibliyini xüsusi vurğulayaraq milli komandamızın hər zaman nümunəvi davranmalı olduğunu bildirib.

Avropa birinciliyində ölkəmizi 8 oğlan və 3 qız idmançı təmsil edəcək:

 Qızlar: Şəbnəm Həsənzadə (49 kq), Nuray Əbilova (49 kq), Hənifə Məhərrəmli (61 kq).

 Oğlanlar: Məhəmməd Rüstəmli (55 kq), İsa Hüseynov (60 kq), Musab Məmmədtağıyev (70 kq), Kamran Xappayev (70 kq), Lətif Əliyev (75 kq), Əbdulhüseyn Hüseynov (75 kq), Fəxrəddin Allahverdiyev (85 kq), Elcan Əliyev (85 kq).

Yığma komandamızı turnirə baş məşqçi Sərdar Həsənov, böyük məşqçi Asif Məmmədov və məşqçi Əfqan Bayramov hazırlayıblar. Mötəbər yarışda ölkəmizi iki ədalət təmsilçisi — Kənan Mustafayev və Səbinə Rzayeva da təmsil edəcək.