Azərbaycan klubu bu gün 18,6 milyon avro qazana bilər

Azərbaycanın “Sabah” futbol klubu bu gün UEFA Çempionlar Liqasının pley-off mərhələsinin cavab oyununda İsrailin “Hapoel Beer-Sheva” komandasını qəbul edəcək.

hadiseler.info xəbər verir ki, ilk görüşdə səfərdə 1:2 hesabı ilə məğlub olan Bakı təmsilçisi doğma meydanda bu nəticəni dəyişərək tarixində ilk dəfə Çempionlar Liqasının əsas mərhələsinə yüksəlməyə çalışacaq.

“Sabah” rəqibini üstələyib mərhələ keçəcəyi təqdirdə, Çempionlar Liqasının əsas mərhələsində iştirakına görə UEFA-dan zəmanətli 18,62 milyon avro qazanacaq. Əsas mərhələdə hər qələbə kluba əlavə 2,1 milyon avro, hər heç-heçə isə 700 min avro gəlir gətirəcək.

Bakı klubu pley-offda məğlub olacağı halda isə Avropa Liqasının əsas mərhələsinə yollanacaq. Bu ssenaridə pley-off və Avropa Liqasında iştirak ödənişləri daxil olmaqla klubun sabit UEFA gəliri ən azı 8,6 milyon avro təşkil edəcək.

Beləliklə, bu axşamkı qarşılaşma “Sabah” üçün həm idman baxımından tarixi uğur, həm də milyonlarla avroluq gəlir deməkdir.