“Borussiya Dortmund” Bakıya gələrkən problemlə üzləşib

UEFA Çempionlar Liqasının əsas mərhələsinin III turu çərçivəsində “Sabah”la qarşılaşacaq Almaniyanın “Borussiya Dortmund” klubu Bakıya səfər edərkən gözlənilməz çətinliklə qarşılaşıb.

hadiseler.info xəbər verir ki, bu barədə Almaniyanın nüfuzlu “Bild” nəşri məlumat yayıb.

Məlumata əsasən, səfər günü səhər komandanı daşıyacaq təyyarənin bütün yük və baqajla birlikdə normadan artıq ağır olduğu müəyyən edilib. Bu səbəbdən Dortmund təmsilçisi son anda planlaşdırılan proqramda dəyişiklik etməli olub. Çəkinin azaldılması üçün baqajın bir hissəsi sponsorların və jurnalistlərin yer aldığı daha erkən reyslə Bakıya göndərilib.

Əks halda komandanı gətirən təyyarə yanacaq doldurmaq məqsədilə uçuş marşrutunun yarısında aralıq eniş etmək məcburiyyətində qalacaqdı.

Qeyd edək ki, “Sabah” – “Borussiya Dortmund” matçı bu gün saat 20:45-də Bakı Olimpiya Stadionunda start götürəcək.