Çimərlik voleybolu üzrə ölkə çempionatına yekun vuruldu

Azərbaycan Voleybol Federasiyası (AVF) və Gənclər və İdman Nazirliyinin birgə təşkilatçılığı ilə keçirilən çimərlik voleybolu üzrə klublararası ölkə çempionatına yekun vurulub. Hadisələr.info xəbər verir ki, bu barədə AVF-dən məlumat verilib.

Avqustun 4-də start götürən çempionatın son günündə Bakı Su İdmanı Sarayında həlledici final qarşılaşmaları baş tutub.

Qadınlar arasında keçirilən gərgin final matçında “Azərreyl Salam” komandası “Azərreyl Salam Sharing” klubuna 2:0 hesabı ilə qalib gələrək qızıl medallara sahib çıxıb. Kişilərin mübarizəsində isə “FHN-2” komandası “Djevo” kollektivini 2:1 hesabı ilə üstələyərək çempionluq kubokunu başı üzərinə qaldırıb.

Oyunlardan sonra mükafatlandırma və bağlama mərasimi keçirilib. Qalib gələn komandalara kubok, diplom və medalları AVF başçısı Şahin Bağırov, baş katib Faiq Orucov və İdarə Heyətinin üzvü Elqar Bağırov təqdim ediblər.

Ölkə çempionu olan hər iki komanda bu il təşkil ediləcək klublararası Avropa çempionatında Azərbaycanı təmsil etmək hüququ qazanıb.