Diyarbakırda faciəvi qəza: Mikroavtobus aşdı — 5 ölü, 11 yaralı

Diyarbakırın Lice rayonunda mikroavtobusun yoldan çıxaraq aşması nəticəsində 5 nəfər həyatını itirib, 3-ü ağır olmaqla 11 nəfər yaralanıb.

hadiseler.info “DHA”ya istinadən xəbər verir ki, hadisə Lice-Kulp avtomobil yolunun Karahasan kəndi yaxınlığında baş verib. Sürücüsünün idarəetməsindən çıxan mikroavtobus aşıb. Məlumata görə, mikroavtobusdakı sərnişinlər nişan mərasimində iştirak etmək üçün Diyarbakırdan Muş istiqamətinə yola düşüblərmiş.

Qəza barədə məlumat daxil olan kimi əraziyə dərhal 112 Təcili Tibbi Yardım, yanğınsöndürmə və jandarma briqadaları cəlb edilib. Hadisə yerində ilk tibbi yardım göstərilən yaralılar təcili olaraq şəhərdəki müxtəlif xəstəxanalara çatdırılıb.

Diyarbakır Valiliyindən verilən rəsmi açıqlamada bildirilib ki, saat 09:00 radələrində baş verən qəza zamanı 2 nəfər fəlakət yerində, 3 nəfər isə aparıldıqları xəstəxanalarda dünyasını dəyişib. Hazırda 3-ü ağır vəziyyətdə olan 11 yaralının müalicəsi davam etdirilir. Hadisə ilə bağlı genişmiqyaslı araşdırma və təhqiqat işlərinə başlanılıb.