“Futbolçuların üstünə çox getmək istəmədim” – Qurban Qurbanov “Dinamo”ya məğlubiyyətdən danışdı

Məlum olduğu kimi, UEFA Konfrans Liqasının III təsnifat mərhələsinin ilk qarşılaşmasında “Qarabağ” səfərdə Ukraynanın “Dinamo” (Kiyev) klubuna 0:1 hesabı ilə uduzub.

Hadisələr.info xəbər verir ki, qarşılaşmanın ardından təşkil edilən mətbuat konfransında Ağdam təmsilçisinin baş məşqçisi Qurban Qurbanov jurnalistlərin suallarını cavablandıraraq görüşü dəyərləndirib.

“Çox danışmağa ehtiyac yoxdur, bu hələ ilk qarşılaşmadır. Rəqibi qələbə münasibətilə təbrik edirəm. İndi bütün fikrimizi cavab oyununa hazırlığa yönəltməliyik. Qarşımızda müdafiədə nizam-intizamlı çıxış edən, sürətli əks-hücumlar təşkil etməyi bacaran keyfiyyətli komanda var idi. Meydanda tempı bir qədər artırmaq vacib idi, lakin hava şəraiti — həddindən artıq isti olması buna imkan vermədi. Bu səbəbdən futbolçulara çox təzyiq etmək istemədim. Bakıda önümüzdə 5-6 günlük hazırlıq vaxtımız var. Matçı hərtərəfli analiz edərək cavab qarşılaşmasına tam hazır olacağıq.”

Baş məşqçi jurnalistlərin suallarını cavablandırarkən komandadakı bəzi texniki məqamlara və futbolumuzdakı legioner limitinə də toxunub:

– Futbolumuzdakı problemlərin səbəblərindən biri yerli futbolçuların az olmasıdır?

“Belə hallar olur. Limitin olmaması da Azərbaycan futbolunda uzun illərdən sonra tətbiq edilən qərardır. Sadəcə, belə bir proqram, belə bir layihə həyata keçirilib və bunun nəticəsini görmək üçün müəyyən vaxt lazımdır. Düşünürəm ki, zamanla özünü doğruldacaq. Ümumilikdə isə klublarımız Avropa oyunlarında heç də pis çıxış etmir. Bir xeyli qələbələrimiz var. Amma bu mövzu genişdir. Ona görə hazırda bu suala ətraflı cavab verə bilməyəcəyəm.”

– Oyunun qırılma nöqtəsi nə oldu?

“Demək olar ki, sadəcə kiçik bir səhv oldu və həmin epizoddan qol buraxdıq. Amma ümumilikdə müdafiədə stabil çıxış etmədik. Hücum xəttində isə bir qədər aqressivlik və aktivlik çatmadı.”

– Zubir bu gün yaxşı formada olmasa da, əsas heyətdə idi. Onu oynatmağınızın əsas səbəbi nə idi?

“Sadəcə bu gün oynatdım. Start heyətində yer aldı, çünki oyun praktikası qazanmağa ehtiyacı var idi. Onunla bağlı müəyyən düşüncələrimiz və planlarımız var idi. İstəyirdik ki, oyuna uyğunlaşsın. Bəzi məqamlarda alındı, bəzi məqamlarda isə tam istədiyimiz kimi olmadı. Bunun arxasında başqa bir səbəb yoxdur.”

Qeyd edək ki, komandalar arasında cavab matçı avqustun 13-də Bakıda keçiriləcək.