Güləşçimiz Ayxan Cavadov dünya çempionatında finala vəsiqə qazanıb

Slovakiyanın paytaxtı Bratislavada keçirilən U-20 dünya çempionatında növbəti finalçılar müəyyənləşib.

hadiseler.info xəbər verir ki, yunan-Roma güləşçimiz Ayxan Cavadov (60 kq) ardıcıl 2-ci dəfə U-20 dünya çempionatının finalına yüksəlib. O, Fransa, Braziliya və İran (Əmirəli Heydəri – 4:3) təmsilçilərini məğlub edərək adını həlledici mərhələyə yazdırıb. A.Cavadov finalda özbəkistanlı Dostonbek Oripovla qarşılaşacaq.

Digər təmsilçilərimizin nəticələri:

 Elmin Əliyev (82 kq, yunan-Roma): Gürcüstan, Yaponiya və Özbəkistan idmançılarına qalib gəlsə də, yarımfinalda belaruslu Kiril Valevskiyə (4:7) uduzub. O, bürünc medal uğrunda mübarizə aparacaq.

 Zəhra Kərimzadə (72 kq, qadın güləşi): 1/4 finalda Türkiyə təmsilçisini məğlub etsə də, yarımfinalda Hindistan idmançısına yenilib. Zəhra da bürünc medal görüşünə çıxacaq.

 Esra Məmmədli (53 kq, qadın güləşi): Təsnifat mərhələsində qazaxıstanlı rəqibinə məğlub olub.