İordaniyada kilsəyə hücumla bağlı 3 terrorçu saxlanıldı

İordaniyanın təhlükəsizlik qüvvələri Karak vilayətindəki pravoslav kilsəsində terror aktı törətməkdə şübhəli bilinən şəxslərə qarşı xüsusi əməliyyat keçirib.

hadiseler.info xəbər verir ki, bu barədə krallığın Daxili İşlər Nazirliyi (DİN) “X” sosial şəbəkə hesabında məlumat yayıb.

Açıqlamada bildirilir ki, oktyabrın 26-da səhər saatlarında həyata keçirilən əməliyyat zamanı Həmmud rayonundakı Müqəddəs Georgi məbədində vətəndaşlara hücum edən üç terrorçunu aşkar etmək mümkün olub. Əl-Kərək şəhərinin kənarında yerləşən tərk edilmiş evdə gizlənən silahlı şəxslər təslim olmaqdan imtina edərək hüquq-mühafizə orqanı əməkdaşlarına atəş açıblar.

Baş verən atışma nəticəsində hər üç şübhəli şəxs yaralanaraq saxlanılıb.

Xatırladaq ki, oktyabrın 23-də İordaniyanın Karak bölgəsindəki kilsədə keçirilən dəfn mərasimi zamanı naməlum şəxs tərəfindən açılan atəş nəticəsində 9 nəfər həlak olmuş, 40 nəfər isə yaralanmışdı.