Kabarda-Balkarda qar uçqunu: Ölənlərin sayı 13-ə çatdı

Kabarda-Balkar Respublikasının Bezengi dərəsindəki Mijirgi dağında baş verən qar uçqunu zonasında axtarış-xilasetmə tədbirləri davam edir.  

hadiseler.info xəbər verir ki, Rusiya Fövqəladə Hallar Nazirliyinin regional Baş İdarəsinin mütəxəssisləri tərəfindən daha bir alpinistin meyiti aşkarlanıb və bununla da faciə nəticəsində həlak olanların sayı 13 nəfərə çatıb.

Sentyabrın 9-da səhər saatlarında bərpa edilən axtarış əməliyyatlarına 41 xilasedicidən ibarət qrup cəlb olunub. Təhlükəli relyef və qar-buz kütləsinin yenidən çökmə riski səbəbindən çətin şəraitdə aparılan əməliyyatlarda hazırda 4 alpinistin taleyi barədə məlumat yoxdur.  

Xatırladaq ki, sentyabrın 6-da axşam saatlarında baş verən uçqun marşrut üzrə hərəkət edən 33 nəfərlik alpinist qrupunun üzərinə düşüb. Hadisə ilə bağlı Rusiya İstintaq Komitəsi tərəfindən səhlənkarlıq faktı üzrə cinayət işi açılıb.