Kamçatkada eyni vaxtda dörd vulkan aktivləşdi-FOTO

Rusiya Federasiyasının Kamçatka yarımadasında eyni vaxtda dörd vulkanın aktivləşərək püskürməsi yerli və beynəlxalq hava yolları üçün ciddi risk yaradıb.

hadiseler.info xəbər verir ki, Kamçatka Vulkan Püskürmələrinə Reaksiya Qrupunun (KVERT) məlumatına görə, Klyuçevskaya sopka vulkanında dəniz səviyyəsindən 6500 metr hündürlüyə kül püskürməsi qeydə alınıb. Hündürlüyü 4750 metr olan bu vulkanda kraterdən lavanın fəvvarə vurması ilə müşayiət olunan strombol tipli aktivlik davam edir və kül dumanları 430 kilometr şərqə doğru uzanıb. Klyuçevskoy üçün “narıncı” təhlükə kodu elan edilib.

Oxşar “narıncı” təhlükə kodu Şiveluç vulkanına da verilib. Burada partlayıcı püskürmə nəticəsində külün 12 kilometrə qədər yüksəlməsi ehtimal olunur ki, bu da beynəlxalq aviasiya marşrutları üçün təhlükə təşkil edir. Bezımyannıy və Kraşeninnikov vulkanlarında isə “sarı” təhlükə səviyyəsi müəyyən edilib; lava axınları və termal anomaliyalar müşahidə olunur. Bütün vulkanlar alimlər tərəfindən aramsız nəzarətdə saxlanılır.