Nepalda fəlakətdə ölənlərin sayı 469-a çatdı

Nepalın şimal bölgələrində tüğyan edən şiddətli daşqınlar nəticəsində həyatını itirənlərin sayı 469 nəfərə yüksəlib.  

hadiseler.info xəbər verir ki, bu barədə yerli polis rəsmi məlumat yayıb. Hüquq-mühafizə orqanlarının son hesabatına əsasən, fəlakət zonasından 1 545 yaralı xilas edilib.  

Axtarış-xilasetmə işlərinə 13 295 təhlükəsizlik əməkdaşı cəlb olunub. Xilasedicilər torpaq və dağıntılar altında qalan insanları çıxarmaq üçün ərazidə təmizləmə işlərini davam etdirirlər. Yüzlərlə şəxsin itkin düşdüyü, onların da təxminən 500 nəfərinin xarici vətəndaşlar olduğu bildirilir.  

Nepalın Baş naziri Balendra Şah vəziyyətin gərgin olaraq qaldığını vurğulayıb: “Bütün dövlət qurumları gücləndirilmiş iş rejimində fəaliyyət göstərir. Hazırda əsas hədəfimiz hər bir vətəndaşın həyatını xilas etmək, itkin düşənləri tapmaq, yaralılara tibbi yardım göstərmək və təbii fəlakətdən əziyyət çəkən ailələrə təcili dəstək verməkdir”.

Qeyd edək ki, avqustun 26-da başlayan daşqına Nepal və Çin sərhədində baş vermiş qar və daş uçqununun səbəb olduğu ehtimal edilir.