Paşinyan Azərbaycana qarşı döyüşmüş polkovnikə yüksək vəzifə verib

Ermənistan Silahlı Qüvvələrində yeni hərbi kadr təyinatı baş tutub. Baş nazir Nikol Paşinyanın təklifi və prezident Vaaqn Xaçaturyanın sərəncamı ilə polkovnik Samvel Qriqoryan Ermənistan Silahlı Qüvvələrinin 3-cü ordu korpusunun komandiri təyin edilib.

hadiseler.info xəbər verir ki, araşdırma zamanı yeni korpus komandirinin keçmişi ilə bağlı diqqətçəkən faktlar ortaya çıxıb. Belə ki, Qarabağda anadan olan Samvel Qriqoryan Aprel döyüşləri, 44 günlük Vətən Müharibəsi və 2023-cü ilin sentyabrında keçirilən antiterror əməliyyatları zamanı Azərbaycan Ordusuna qarşı aktiv hərbi əməliyyatlarda iştirak edib. Qriqoryan uzun illər separatçı rejimin hərbi strukturlarında çalışaraq qondarma “Artsax Müdafiə Ordusu”nun qərargah rəisi vəzifəsinədək yüksəlib və 2020-ci ilin oktyabrında II dərəcəli “Döyüş xaçı” ordeni ilə təltif olunub.

Həmçinin Azərbaycan Müdafiə Nazirliyinin 2020-ci ilin oktyabrında yaydığı məlumatda 10-cu dağ-atıcı diviziyanın qərargah rəisi olmuş S.Qriqoryanın ordumuzun endirdiyi dəqiq zərbə nəticəsində ağır yaralandığı bildirilirdi. Ekspertlər sülh gündəliyinin müzakirə olunduğu bir dövrdə Azərbaycana qarşı döyüşmüş zabitin yüksək komandanlığa gətirilməsini İrəvanın normallaşma prosesinə zidd addımı və Ermənistan ordusundakı kadr böhranının göstəricisi kimi qiymətləndirirlər.