Rusiyada avtomobil dayanacağa çırpıldı: Ölən və yaralananlar var – VİDEO

Rusiyanın Yaroslavl şəhərində ölüm və xəsarətlə nəticələnən ağır yol-nəqliyyat hadisəsi baş verib.

hadiseler.info xəbər verir ki, bu barədə regional Daxili İşlər Nazirliyinin (DİN) Mətbuat xidməti məlumat yayıb.

Hadisə Moskva vaxtı ilə saat 08:18 radələrində Tutayevsk şosesində qeydə alınıb. Xarici markalı avtomobili idarə edən şəxs polisin “saxla” əmrinə tabe olmayaraq qaydaları kobud şəkildə pozub və yüksək sürətlə dayanacağa, eləcə də piyadalara çırpılıb. Qəza nəticəsində 1985-ci il təvəllüdlü bir kişi hadisə yerində həyatını itirib, daha iki nəfər isə müxtəlif dərəcəli bədən xəsarətləri ilə xəstəxanaya yerləşdirilib.

Hadisə yerindən qaçmağa cəhd göstərən hüquq pozucusu keçirilən operativ tədbirlər nəticəsində saxlanılıb. Məlum olub ki, sükan arxasında olan 18 yaşlı gəncin sürücülük hüququ yoxdur. Hazırda faktla bağlı cinayət işinin başlanması məsələsinə baxılır.