Sabahdan metroda mühüm DƏYİŞİKLİK OLACAQ

“Bakı Metropoliteni” QSC tərəfindən “qırmızı” və “yaşıl” xətlərin bir-birindən ayrılması layihəsinin əsas tikinti-quraşdırma mərhələsinə start verilir.

hadiseler.info xəbər verir ki, Prezident İlham Əliyevin Sərəncamı ilə təsdiqlənmiş “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı”na uyğun icra edilən inşaat işləri təxminən 10-11 ay davam edəcək.

Hərəkət sxemində hansı dəyişikliklər olunur?

 “Nizami” – “28 May” mənzili: Tikinti müddətində bu iki stansiya arasında qatarların gediş-gəlişi tam dayandırılacaq.

 “Qırmızı” xətt: Qatarlar “İçərişəhər” – “Əhmədli” marşrutu üzrə 2 dəqiqə 30 saniyəlik intervalla hərəkət edəcək. (“Əhmədli” – “Həzi Aslanov” mənzilində təmir bitənədək mövcud məkik interval saxlanılacaq).

 “Yaşıl” xətt: Qatarlar “Dərnəgül” – “Nizami” marşrutu üzrə 3 dəqiqə 30 saniyəlik intervalla fəaliyyət göstərəcək.

 “Cəfər Cabbarlı” – “Xətai”: Məkik rejimdə 7 dəqiqəlik interval qüvvədə qalacaq.

 “Bənövşəyi” xətt: “Xocəsən” – “8 Noyabr” xətti üzrə 8 dəqiqəlik interval dəyişməz qalacaq.

Açılan 6 yeni ekspres avtobus xətti (M1-M6)

“28 May” və “Nizami” stansiyaları arasında yaranacaq sərnişin sıxlığını aradan qaldırmaq məqsədilə AYNA tərəfindən saat 06:00-dan 00:00-dək ödənişli əsaslarla fəaliyyət göstərən 6 yeni ekspres marşrut istifadəyə verilir:

 M1: “Elmlər Akademiyası” m/s – “28 May” m/s

 M2: “İnşaatçılar” m/s – “Nizami” m/s – “28 May” m/s

 M3: “20 Yanvar” m/s – “Nizami” m/s – “28 May” m/s

 M4: “20 Yanvar” m/s – “Koroğlu” m/s

 M5: “20 Yanvar” m/s – “Gənclik” m/s

 M6: “Elmlər Akademiyası” m/s – “Gənclik” m/s

Bununla yanaşı, 2, 6, 7A, 9, 10, 14, 17, 18, 26, 61, 65, 79, 85, 88, 88A, 93, 133, 165, 199 və 202 nömrəli müntəzəm avtobus xətlərində də nəqliyyat vasitələrinin sayı artırılacaq.