Uqandalı futbolçu silahlı hücum nəticəsində qətlə yetirilib

Uqanda millisinin və “SC Villa” klubunun kapitanı Devid Ovori Kampalada silahlı hücumun qurbanı olub.

Hadisələr.info xəbər verir ki, 27 yaşlı futbolçu avqustun 4-ü axşam saatlarında Makindaye rayonunda, yaşadığı evin yaxınlığında naməlum şəxslərin hücumuna məruz qalıb.

Ağır xəsarətlərlə xəstəxanaya çatdırılan Ovori həkimlərin səylərinə baxmayaraq, ertəsi gün səhər saatlarında vəfat edib.

Qeyd edək ki, müdafiəçi və yarımmüdafiəçi mövqelərində çıxış edən futbolçu 2024-cü ildə “Villa” klubunun son 20 ildə ilk dəfə Uqanda çempionu olmasında mühüm rol oynayıb. O, 2026-cı ilin may ayında ölkə kubokunun ən yaxşı müdafiəçisi seçilmişdi. Karyerası ərzində İspaniyanın “Velez” və İsveçin “Utsiktens” klublarında da oynayan Ovori komandasının heyətində son matçına faciədən üç gün əvvəl çıxmışdı.

Polis faktla bağlı araşdırmalara başlayıb. Hücumun soyğunçuluq və ya cinayətkar qrupların qarşıdurması ilə bağlı olduğu ehtimal edilsə də, dəqiq motiv hələlik məlum deyil.