Boks dünyasını sarsıdan itki:Priçard Kolon vəfat etdi

Puertorikolu keçmiş peşəkar boksçu Priçard Kolon 33 yaşında dünyasını dəyişib.

hadiseler.info xəbər verir ki, bu kədərli xəbəri idmançının atası və məşqçisi Riçard Kolon özünün “Instagram” hesabında paylaşaraq təsdiqləyib.

Atası övladının artıq daha sakit və yaxşı bir yerdə olduğunu bildirib. O, oğlunun ən böyük arzusunu reallaşdıraraq onu dincəlmək üçün Puerto-Rikoya aparmaq istədiyini, lakin bunun baş tutmadığını vurğulayıb. Riçard Kolon ailəsinə uzun illər boyu dəstək olan və sevgi göstərən hər kəsə minnətdarlığını bildirib, duaların davam etdirilməsini xahiş edib.  

Xatırladaq ki, Priçard Kolonun parlaq idman karyerası 17 oktyabr 2015-ci ildə amerikalı boksçu Terrell Uilyamsla döyüşdə aldığı ağır zədədən sonra faciəvi şəkildə yarımçıq qalmışdı. Görüş zamanı rəqibi ona qaydalara zidd olaraq başın arxa hissəsindən (ense) dəfələrlə ağır zərbələr endirmişdi. Döyüşdən dərhal sonra soyunub-geyinmə otağında huşunu itirən boksçuda subdural hematoma (beyin qanaxması) aşkar edilmiş və o, təcili əməliyyat olunmuşdu.  

221 gün komada qalan Kolon gözlərini açsa da, ömrünün sonunadək həmin ağır kəllə-beyin travmasının fəsadlarından əziyyət çəkib və yerimək, danışmaq qabiliyyətini itirmişdi.  

Qeyd edək ki, faciəvi döyüşədək Priçard Kolon peşəkar rinqdə keçirdiyi 16 görüşün hamısında qələbə qazanmışdı (13-ü nokautla) və gələcəyin dünya çempionu kimi göstərilirdi.